«Құқықтық көмек»: Астанада тегін заңгерлік кеңес берілді

Елордадағы «Орталық базар» сауда үйінде «AMANAT» партиясының қалалық филиалы Байқоңыр ауданы әкімдігінің қолдауымен «Құқықтық көмек күні» акциясын өткізді. Іс-шара «Құқықтық көмек» және «Қарызсыз қоғам» партиялық жобалары аясында ұйымдастырылды, деп хабарлайды Azattyq Rýhy.

Мақсат – халықтың құқықтық және қаржылық сауаттылығын арттыру

Астана әкімдігінің мәліметінше, акцияның негізгі мақсаты – елорда тұрғындарына білікті заңгерлік және қаржылық кеңес беру, сондай-ақ қаржылық сауаттылықты арттыру. Бұл бастама қоғамдағы әлеуметтік және экономикалық мәселелердің алдын алуға бағытталған.

«Осыған дейін Астаналық базарда 100-ден астам адамға түрлі сала бойынша көмек көрсеттік. Енді Орталық базарда өткізіп жатырмыз. Мақсатымыз – халықты партиялық жобалармен таныстырып, бірнеше мекеме өкілдерін бір жерге жинап, жан-жақты көмек көрсету», – деді «AMANAT» партиясының Астана қалалық филиалының атқарушы хатшысы Мұхаммед Болысбек.

Кеңес берген мекемелер мен мамандар

Іс-шара барысында азаматтар несие проблемалары, құқықтық сұрақтар, зейнетақы мәселелері, құжаттандыру және басқа да маңызды тақырыптар бойынша тегін кеңес алды.

Қоғамдық қабылдауға келесі ұйымдар мен мамандар қатысты:

• «Қарызсыз қоғам» жобасының үйлестірушілері;
• БЖЗҚ (Зейнетақы қоры);
• Әділет департаменті;
• Адвокаттар алқасы мен заң кеңесшілері;
• Мәжіліс депутаты Дәулет Мұқаев.

«Несие бойынша мерзімі өткен қарыздар, заңдық кеңестер сынды түрлі сұрақтар көтерілді. Мұндай қабылдауларды Астананың өзге сауда орындарында да тұрақты өткіземіз», – деді қалалық филиалдың баспасөз хатшысы Сұлтан Мұстафин.