$ 509.51  570.6  6.3
ҚАЗ
×
Бұл желілік ресурстың ақпараттық өнімдері 18 жастан асқан адамдарға арналған.

Шерзат Полат ісі: судья блогерлерді арандатушылық жасамауға шақырды

Судьяның айтуынша, үкім шықпай тұрып, болып жатқан оқиғаға субъективті баға беруге жол берілмейді

Шерзат Полат ісі: судья блогерлерді арандатушылық жасамауға шақырды
Фото: Видеодан скрин

Марқұм Шерзат Полаттың ісі бойынша судья блогерлерді арандатушылық жасамауға шақырды, деп хабарлайды Azattyq Rýhy.

Талдықорғанда 2024 жылғы 4 қазанға қараған түні Шерзат Полатты өлтіру фактісі бойынша сот процесі жалғасып жатыр. Бүгінгі сот отырысы судья Ержан Жанұзақовтың мәлімдемесінен басталды.

Судьяның айтуынша, іске қатысы жоқ блогерлер тергеу әрекеттеріне қатысты субъективті баға беріп жатыр.

«Қазақстан Республикасы Конституциясының 75-бабына сәйкес, елімізде сот төрелігін тек сот жүзеге асырады. Бұл процеске араласуға жол берілмейді және ол үшін жауапкершілік қарастырылған. Сот үкімі шықпайынша, іске құқықтық баға беруге болмайды. Айыптау мен қорғау тараптарының уәждерін мұқият зерттеу қажет. Істі қарайтын судья тәуелсіз, объективті, мүдделі емес және қандай да бір ықпалға ұшырамауға тиіс. Сот тек заңға сүйеніп, бейтарап төрелік етеді», — деді Жанұзақов.

Судьяның нақтылауынша, үкім шықпай тұрып, болып жатқан оқиғаға субъективті баға беруге жол берілмейді.

«Осыған байланысты блогерлер мен басқа да әлеуметтік желі қолданушыларын арандатушы әрекеттерден бас тартуға шақырамыз. Соттың әділ әрі негізделген үкім шығаратынына кепілдік береміз», — деп түйіндеді Ержан Жанұзақов.

Серіктес жаңалықтары