Алматыда көлігіне жарнама құрылғысын орнатқан жүргізушілер жазаланды
Соңғы уақытта қала жолдарында жарнамалық құрылымдары бар көліктер жиілеп кетті
Алматыда көлігіне жарнама құрылғысын орнатып алған жүргізушілер жауапқа тартылды, деп хабарлайды Azattyq Rýhy.
Соңғы уақытта қала жолдарында жарнамалық құрылымдары, оның ішінде электронды дисплейі бар көліктер жиілеп кетті.
«Оларды орнату – көлік құралының құрылымын өзгерту, бұл жол қауіпсіздігіне әсер етуі мүмкін екенін еске саламыз. Жарнамалық жабдықты заңды түрде орнату үшін арнайы рұқсат алу керек. Бұл өзгерістердің қауіпсіздік талаптарын бұзбайтынын растау үшін алдын ала техникалық бағалауды қажет етеді. Сонымен қатар, жарнама құрылымдары белгіленген стандарттарға сәйкес келуі керек. Олар жүргізушілерге кедергі келтірмеуі, жол қозғалысына қатысушылардың назарын аудармауы немесе жол-көлік оқиғасы кезінде қауіп төндірмеуі керек», - деді, Алматы қалалық ПД әкімшілік полиция басқармасының бастығы Асхат Құлбаев.
Баяндамашы қолданыстағы заңнама талаптарын бұзғаны үшін ҚР ӘҚбК-нің 590-бабы 5-бөлімі және 590-бабы 7-бөліміне сәйкес жауапкершілік қарастырылғанын атап өтті.
«Біз баршаңызды ережелерді сақтауға және қажетті рұқсаттарды уақытылы алуға шақырамыз. Бұл тек сіздің ғана емес, айналаңыздағылардың да қауіпсіздігі», - деді, Асхат Құлбаев.
