Ұсталған азамат кінәсін мойындап, табылған заттар тәркіленді
Семейде түрмеге тыйым салынған заттарды эмульсия шелегіне жасырып өткізбек болған адам ұсталды, деп хабарлайды Azattyq Rýhy.
Ұлттық ұланның мәліметінше, 5511 әскери бөлімнің сарбаздары Семей қаласындағы №19 түзеу мекемесінде қызмет атқару барысында бес смартфон, бес SIM-карта, Wi-Fi роутері мен бес литр алкогольді ішімдіктің түрмеге кіргізілуіне тосқауыл болды. Заңсыз әрекетке барған азамат тыйым салынған заттарды эмульсия шелегіне жасырып, сыртын бірнеше қабаттап орап тастаған.
Жедел мақсаттағы батальон бөлімшесінің командирі сержант Берік Акибаев құрылыс материалының тым көп оралғанынан күдіктенеді.
«30 литрлік эмульсияның сыртын скотчпен әбден оралғаны сезік тудырды. Тексеру кезінде шелек ішінде тағы бір ыдыстың барын байқадым. Сол ыдысқа тыйым салынған заттар жасырылған екен», — дейді сержант Акибаев.
Ұсталған азамат кінәсін мойындады. Табылған заттар тәркіленіп, Қызметтік-атқару жүйесінің өкілдеріне тапсырылды.