Қостанайда шенеуніктер санитарлық қорытынды беру ережесін жаппай бұзғаны анықталды

Қостанай қалалық санитарлық-эпидемиологиялық бақылау басқармасы азаматтарды өз ұстанымдарын білдіру мүмкіндігінен айырғаны анықталды. Бұл туралы Azattyq Rýhy агенттігі Tobolinfo-ға сілтеме жасап хабарлайды.

Жоспарлы тексеру нәтижесінде департамент мемлекеттік қызметтерді көрсету тәртібін бұзу фактілерін анықтады, деп мәлім етті Мемлекеттік қызмет істері департаменті.

Денсаулық сақтау министрінің 2020 жылғы 30 желтоқсандағы бұйрығы арқылы бекітілген қорытынды беру бойынша мемлекеттік қызметті көрсету қағидаларына сәйкес, санитариялық-эпидемиологиялық қорытынды беруден бас тартылған жағдайда көрсетілетін қызметті беруші өз шешімі туралы өтініш берушіні алдын ала хабардар етуге міндетті.

«Бұл талап негізсіз шешімдерді болдырмау мақсатында азаматтарға қосымша дәлелдер келтіру мүмкіндігін беруге бағытталған. Алайда, тексеру барысында ведомство қызметкерлері белгіленген мерзімде өтініш берушілерге бас тарту туралы хабарламай, бұл талапты жүйелі түрде бұзғаны анықталды. Ережеге сәйкес, соңғы шешім қабылданғанға дейін 3 күннен кешіктірілмей хабарлама жіберіледі», - делінген хабарламада.

Бұл азаматтарға өз құқықтарын қорғауға және ұстанымдарын дәлелдеуге нақты мүмкіндік береді. Өкінішке қарай, өтініш берушілер бас тарту туралы түпкілікті шешім қабылданғаннан кейін ғана білген. Осылайша мемлекеттік қызметшілер азаматтарды жағдайды түзету мүмкіндігінен айырды.

2024 жылы барлығы 50-ден астам осындай бұзушылық анықталды, бұл мәселенің жүйелік сипатын көрсетеді. Осыған байланысты департамент тарапынан заң бұзушылықтарды жою және кінәлі тұлғалардың жауапкершілігі туралы мәселені қарау туралы ұсыныс енгізілді.