Қарағанды облысының трассаларында жүздеген көлік кептеліп қалған

Қарағанды облысының трассаларында боран соғып, жолдар жабылып жатыр. Боран салдарынан трассаларда екі жүзге тарта көлік кептеліп қалған, деп хабарлайды Azattyq Rýhy.

Қарағанды облысының төтенше жағдайлар департаменті хабарлағандай, «Астана – Қарағанды – Алматы» автожолының Ақмола облысының шекарасы, Теміртау ақы алу пунктінде және «Қызылорда – Жезқазған – Қарағанды – Шідерті» автожолының учаскесінде Қарағанды – Павлодар облысы шекарасындағы жолдар жабылған.

Patriot Telegram арнасының мәліметінше, мынандай көліктер кептелісте тұрып қалған:

• Жүк көлігі – 113 бірлік техника, 166 адам.
• Жеңіл көлік – 98 бірлік техника, 177 адам.
• Қоғамдық көлік – 2 автобус, 28 адам (Шымкент-Астана: 26 адам, оның ішінде екі бала; Алматы-Астана 2 адам).

Айта кетейік, бүгін боранға байланысты Астанадан шығаберіс тасжолдар жабылып қалған болатын.