«Қаржы жұмыс істейтіндерге беріледі»: депутат отандық өндірушілерге қатысты жаңа заң жайлы айтты

Мәжіліс депутаттары тауарлардың шыққан елін анықтау мәселелері бойынша заң жобасын қарап жатыр. Бұл қазақстандық тауар өндірушілердің жұмысын ретке келтіруге мүмкіндік береді. Осы орайда Мәжіліс депутаты, «AMANAT» партиясы фракциясының жетекшісі Елнұр Бейсенбаев құжаттың маңызы мен қажеттілігі жайлы айтты, деп хабарлайды  Azattyq Rýhy.

«Қазіргі уақытта халқымыздың ең басты қорқынышы бағаның күнделікті өсуі және ұлттық валютаның құбылмалы бағамы болып отыр. Бұл сұрақтар біздің еліміздегі әрбір отбасын толғандырады. Адамдар табысын жоғалтып, ертең не күтіп тұрғанынан бейхабар. 2000-шы жылдардың басында дүниеге келген мыңдаған жас қазақстандықтың жыл сайын еңбек нарығына шығуы біздің экономикамыз үшін үлкен ауыртпалық болды. Білімді және еңбекқор жастарымыз адал жұмыс істеп, карьера құрып, болашағына сенімді болғысы келеді. Бірақ оларға лайықты жұмыс табу қиын, өйткені елде өндірістік кәсіпорындар жетіспейді», - дейді Бейсенбаев.

Депутат жақында осы залда Ұлттық қордан триллион трансферт пен салық жинау бойынша үлкен проблемалары бар бюджетті қабылдағандарын еске салды.  

«Барлық осы мәселе бойынша күн сайын БАҚ-та проблемалы жаңалықтар шығады. Қазір министрлер экономикадағы жағдай қашан жақсаратыны жайлы журналистерге нақты жауап бере алмайтынын бәріміз көріп жүрміз. Барлық жерде күрделі халықаралық жағдайға ғана сілтейді. Бірақ бұл тек халықты ашуландырады. Жұрт бізден оны күтіп отырған жоқ», - дейді Елнұр Бейсенбаев.

Сонымен қатар, ол үкіметтің күн тәртібінен елдің ЖІӨ-сін екі есеге арттыруды көздейтін жаңа экономикалық саясатты жүзеге асыру шығып қалғанын айтты.

«Бір кездері мемлекет басшысының алға қойған бұл стратегиялық міндетін бүкіл қоғам толық қолдады. Осы залда отырғандардың барлығына, барлық қазақстандыққа біздің экономикамызға үлкен жүйелі өзгерістер қажет екені түсінікті. Барлық сарапшы сұхбаттарында бізге жұмыс орындарын ашатын, салық төлейтін, халықты қажетті тауарлармен қамтамасыз ететін мықты өндіріс қажет дейді. Бірақ бұл өндірістер өздігінен пайда болмайды. Олар үшін жағдай жасау керек. Бүгін біз осы бағытта үлкен қадам жасайтын заң қабылдаймыз. Осы заң жобасының бастамашысы және жұмыс тобының басшысы – «AMANAT» партиясы фракциясының депутаттары», - деді ол.

Ол атағандай, бұл заңда қазақстандық тауарлардың тізімін құру және жүргізу үшін адал және ашық жағдайлар жазылады.

«Бұл бүкіл ел бойынша жаңа өндірістер деген сөз. Бизнес үшін бұл мүлдем тегін болады. Бұл тізілімге қосудың мерзімі шексіз. Салалық қауымдастықтармен бірге «Made in Kazakhstan» өндірісінің нақты және түсінікті стандарттары әзірленеді. Оларда барлық процес пен талап жазылады. Өндірістің барлық деңгейінде цифрлық верификация жүргізіледі. Салық төлеуден бастап, қызметкерлерге әлеуметтік аударымдар, жалақы мен коммуналдық төлемдерге дейін», - дейді Бейсенбаев.

Депутат ақпарат жасанды интеллект арқылы тұрақты негізде жүзден астам көрсеткіш бойынша жиналады дейді.

«Мұның бәрі онлайн режимде және бизнеске ешқандай ауыртпалықсыз жасалады. Пәтерде миллиондаған тауар өндіретін, штатында бірде-бір қызметкері жоқ, тек қазақстандық үлгідегі мөрі мен жапсырмалары бар фантомдар артта қалады. Мемлекет жыл сайын қазақстандық өндірушілерді қолдауға триллиондаған теңге бөледі. Бұл – инфрақұрылым, салықтық жеңілдіктер, жеңілдетілген қаржыландыру. Оларға мемлекеттік сатып алуларға басымдық беріледі, бұл жыл сайын шамамен 7 триллион теңгеге тең. Біз көлік шығындарының жартысына дейін өтейміз. Президенттің бизнестен жұмыс істейтін кәсіпорындар түрінде қайтарымды және импортқа тәуелділікті төмендетуді талап еткені әділетті», - дейді Елнұр Бейсенбаев.

Оның айтуынша, осы триллион долларлық шығындарға жауап ретінде біздің азаматтар дүкен сөрелерінде шетелдік президенттің әрбір инаугурациясынан кейін бағасы шарықтап кетпейтін сапалы отандық тауарларды көргісі келеді.

«Бұл – экономикалық тәуелсіздік. Бүгін біз қарастырып отырған заңның арқасында мемлекеттік қолдаудың барлық күші енді тек нақты жұмыс істейтін өндірістерге бағытталады. Біз заңнамалық деңгейде адал бизнес пен нағыз бәсекелестік үшін жағдай жасаймыз. Еліміз қазірдің өзінде миллиард долларлық бюджет қаражаты тиісті бақылаусыз құмға кететін кезеңнен өтті. Біздің жадымызда ҮИИД МБ деп аталатын бағдарлама ұзақ уақыт сақталады. Біз енді уақытты жоғалтуға  жол бере алмаймыз. Бүгін қарастырылып отырған заң бұған жол бермейді. Осы маңызды заң жобасын қолдауды сұраймын», - деді Елнұр Бейсенбаев.