Ақтөбе тұрғының гаражынан бір мөшек есірткі табылды

Ақтөбе қаласында 38 жастағы ер адамның гаражынан бір мөшек есірткі табылды, деп хабарлайды Azattyq Rýhy.

Полиция департаментінің мәліметінше, қызметтік-іздестіру итін қолдана отырып тінту жүргізу кезінде оның автокөлігінің салонынан ішіне өсімдік тектес зат салынған 2 полиэтилен пакет табылып, тәркіленді.

Сондай-ақ, күдіктінің гаражынан 1 орама пен 16 полиэтилен пакет табылды, олардың ішінде ерекше иісі бар жасыл түсті заттар болды.

«Мәртөк ауданының аумағында орналасқан шаруа қожалығын санкцияланған тінту кезінде жасыл түсті зат салынған полиэтилен пакет анықталды.

Сараптама қорытындысы барлық тәркіленген заттар «марихуана» есірткі заты екенін көрсетті. Тәркіленген есірткі құралдарының жалпы салмағы 36 килограмды құрайды.

Бұл факті бойынша қылмыстық іс қозғалды», - делінген Полиция департаментінің хабарламасында.

Күдікті уақытша ұстау изоляторына қамалды. Тергеу жүргізіліп жатыр.