Бурабайда құбырлардың жағдайын тексеретін робот іске қосылды
Ол кәріз құбырларындағы ақауларды анықтау үшін қолданылады
Ақмола облысының Бурабай ауданында құбырлардың жағдайын тексеруге арналған робот іске қосылды, деп хабарлайды Azattyq Rýhy. облыс әкімдігінің баспасөз қызметіне сілтеме жасап.
«Робот-телеинспектор заманауи камералар мен сенсорлармен жабдықталған. Бұл құрылғы жоғары дәлдіктегі бейнелерді түсіріп, құбырлардың жағдайына жан-жақты талдау жасауға мүмкіндік береді. Робот диаметрі 300-ден 1000 мм-ге дейінгі кәріз құбырларындағы ақауларды анықтау үшін қолданылады», — делінген хабарламада.
Жаңа коммуналдық көмекші мен арнайы техниканың кілттерін аудандық коммуналдық қызметтерге Ақмола облысының әкімі Марат Ахметжанов салтанатты түрде табыстады. Бұл жаңашылдықтар Бурабай ауданындағы инфрақұрылымды жақсартып, коммуналдық қызметтердің жұмысын жеңілдетуге және тұрғындарға сапалы қызмет көрсетуге бағытталған.
