Ресейдегі елшілік қазақстандықтарға ескерту жасады

Қазақстанның Ресейдегі елшілігі Ресейге сапар шегуді жоспарлап отырған қазақстандықтарға жаңа ережелер туралы ескерту жасады, деп хабарлайды Azattyq Rýhy. 

«2025 жылдың 1 қаңтарынан бастап Ресейге визасыз кіретін шетел азаматтарының уақытша болу ережелеріне өзгерістер енгізіледі. 2024 жылғы 8 тамызда қабылданған №260-ФЗ Федералдық заңы бойынша, шетел азаматтарының Ресей аумағында болу мерзімі жыл ішінде 90 күнмен шектеледі», — делінген хабарламада.

Ресей аумағында шетел азаматтарының болу мерзімі бір жылдың ішінде жиынтық түрде 90 күнмен шектелді (бұған дейін 180 күн ішінде 90 күн болуы мүмкін еді).

Тек білім алу, жұмыс істеу, уақытша тұру немесе баспана алу мақсатында келген азаматтар ғана Ресейде 90 күннен артық бола алады.