Астана халықаралық әуежайы өзінің 8,3 миллионыншы жолаушысын күтіп алды
Елорда әуежайының 8,3 миллионыншы жолаушысы LO195 рейсімен Варшава-Астана бағытымен ұшып келді
Кеше Астана халықаралық әуежайы өзінің 8,3 миллионыншы жолаушысына қызмет көрсетті. Бұл 2024 жылғы рекордтық көрсеткіш, сондай-ақ Астана әуежайы үшін тарихи оқиға. Елорда әуежайының 8,3 миллионыншы жолаушысы LO195 рейсімен Варшава-Астана бағытымен ұшып келді, деп хабарлайды Azattyq Rýhy әуежайдың баспасөз қызметіне сілтеме жасап.
«Астана халықаралық әуежайы жылдан жылға әлемдік авиациялық қоғамдастықта өзінің маңыздылығын дәлелдеп келе жатыр. 2024 жылы біздің әуежайдан Сеул, Гоа, Фукуок, Пхукет, Абу-Даби, Сиануквилл, Милан, Прага және Минералды Суларға тұрақты рейстер ашылып, жаңартылды. Өткен жылы біз 7,5 миллион жолаушыға қызмет көрсетсек, биыл жолаушылар ағынының өсімі 10% құрап, 8,3 миллионға жетті», - деді Астана халықаралық әуежайының Басқарма Төрағасы Юсуф Альжавдер.
Бұл жетістік әуежайдың елдегі көлік инфрақұрылымын дамытудағы маңызды рөлін және оның Қазақстан экономикасына қосқан үлесін көрсетеді. Астана әуежайынан орта есеппен 200-ден астам рейс орындалады, бұл Қазақстанның бас қаласына туристік және іскерлік бағыт ретінде қызығушылықтың артып келе жатқанын көрсетеді.
