Алматыда үш қалта ұрысы ұсталды
Олар Алатау және Жетісу аудандарында қолға түскен
Алматыда полицейлер қоғамдық көлікте ұрлық жасағаны үшін бірнеше қалта ұрысын ұстады, деп хабарлайды Azattyq Rýhy Polisia.kz-ке сілтеме жасап.
Ішкі істер министрлігінің мәліметінше, ұрлықпен айналысатын топ Алатау және Жетісу аудандарында қолға түскен. Криминалдық полицияның хабарлауынша, күдіктілер адамдар көп шоғырланған жерлерде әрекет еткен.
«27 жастағы ер адам 141-бағыттағы автобуста жолаушының ұялы телефонын ұрлағаннан кейін ұсталды. Оның «әріптестері» Жетісу ауданында қолға түсті. Сонымен қатар олардың қарақшылық әрекеттерге қатысы бар екені анықталды», – делінген хабарламада.
Аталған фактілер бойынша қылмыстық істер қозғалды, ал күдіктілер қамауға алынды. Қазіргі уақытта олардың басқа да қылмыстарға қатысы бар-жоғын анықтау бойынша тергеу жұмыстары жүргізіліп жатыр.
