Министр мектептер қай өңірлерде ашылатынын айтты
Оқу-ағарту министрі Ғани Бейсембаев Ресейде бірнеше қазақ мектебі ашылатынын растады, деп хабарлайды Azattyq Rýhy.
Министрдің айтуынша, қазақ мектептері Ресейдің үш аймағында ашылады.
«Қазір мәселе пысықталуда. Ресейде үш аймақ таңдалады. Олардың бірі – Астрахан, одан әрі Орынбор болуы керек. Қазір есімде жоқ, Томск сияқты. Қазақ диаспорасы көп шоғырланған елді мекендерде қазақ мектептерінің ашылуы пысықталып жатыр», - деп растады министр.
Осыған дейін әлеуметтік желіде Ресейдің Астрахан облысында тұратын қазақтар өз аймағында қазақ тілінде оқытатын мектептер ашуды сұрағаны туралы ақпарат жарияланған.