16 жасар оқушыны жезөкшелікке мәжбүрлеу ісі: Қызылордада айыпталушыға қатысты сот үкімі шықты

Қызылордада 16 жасар оқушыны жезөкшелікке мәжбүрлеу бойынша қылмыстық іске қатысты сот үкімі шықты, деп хабарлайды Azattyq Rýhy.

Қызылорда қаласының №2 сотында айыпталушыға қатысты ҚР ҚК 194-бабы 2-бөлігінің 1-тармағы бойынша (қорқыту) қылмыстық іс қаралды. 

«Сотталушы жәбірленушіні масқаралайтын мәліметтерді жариялаймын деп кәмелетке толмаған жәбірленушіден 700 000 теңге ақша тауып беруін талап еткен, сонымен қатар оның сөмкесін алып, ішінде тұрған 35 000 теңге ақшаны қорқытып алған. Сотталушының кінәсі кәмелетке толмаған жәбірленушінің біркелкі жауаптарымен, оқиға орнын қарап-тексеру туралы хаттамасымен, беттестіру жүргізу хаттамаларымен, сот психологиялық-психиатриялық сараптама қорытындысымен бекітілді», - делінген сот хабарламасында.

Сот үкімімен сотталушы ҚР ҚК 194-бабы 2-бөлігінің 1-тармағы бойынша кінәлі деп танылды. 

ҚК-тің аталған бабының санкциясы 3 жылдан 7 жылға дейін бас бостандығынан айыру жазасын көздейді.

«ҚК-нің 55-бабының 2-бөлігінің 2) тармағына сай, жазаны жеңілдететін мән-жайлар болған және ауырлататын мән-жайлар болмаған кезде, жаза мерзімі ҚК-тің тиісті бабында көзделген ең жоғары мерзімнің 2/3 –нен асыруға болмайды делінген. Іс бойынша қылмыстық жауаптылықты ауырлататын мән-жайлар анықталмаған. Жеңілдетілген мән-жай ретінде оның бұрын сотталмағаны және жастығы ескерілді (21 жас). Яғни, ең жоғары жаза 7 жылдың 2/3-нен аспауы тиіс.  Осының негізінде, сот сотталушыға 4 жыл 6 ай мерзімге бас бостандығынан айыру жазасын тағайындады», - деп хабарлады қалалық соттан.

Үкім заңды күшіне енген жоқ.