Баянауыл туристер арқылы жазда 1,3 миллиард теңге пайда таппақ

Алдын ала есептеу бойынша, Баянауыл ұлттық паркінің курорттық аймағына алдағы жазда 300 мыңға жуық қонақ барады. Бұл туралы Өңірлік коммуникациялар қызметінде өткен баспасөз мәслихатында Павлодар облысының әкімі Әбілқайыр Сқақов мәлім етті.

Коронавирус пандемиясы салдарынан шетелге шығу қысқаруына байланысты осы жазда Павлодар облысында өткен жылға қарағанда туристерді көбірек қабылдауға дайындалып жатыр. Журналистермен болған кездесуде өңір басшысы жақында Жасыбай, Сабындыкөл және Торайғыр көлдерін аралап көргенін,бірақ көптеген жағажайларда туристер үшін қарапайым жағдай да жасалмағанын айтты.

«Қазір құзыретті басқармалар, Баянауыл ауданының басшылығы және менің туризмге жауапты орынбасарым курорттық аймақты дамыту жоспарын дайындауда», - деп атап өтті Әбілқайыр Сқақов.

Жоспардың басты міндеті-туристердің негізгі қажеттіліктерін қанағаттандыру.  Яғни, оларға жақын жерде душ қабылдау орындары, әжетханалар, киім ауыстыратын кабинкалар, сауда орындары, банкоматтар, ақпараттық стендтер және т.б. болуы тиіс.

«Биылғы жылы курорттық аймақта 30 километрге жуық жолға асфальт төселеді, 13,5 километр электр желісі және 52 километрге жуық су құбыры салынады. Жазғы маусымның ашылуына дейін Баянауылда Әулие бұлақ пен Қоңыр әулие үңгірі аумақтарын абаттандыру жұмыстары басталды. Сондай-ақ, Торайғыр ауылынан көл жағажайына және Қоңыр әулие үңгіріне дейін жол салынып жатыр. Бұрын ол жерде асфальтталған жол болған жо»қ, - деп атап өтті Павлодар облысының әкімі.

Өткен жылы Баянауылда 160 мыңға жуық адам демалса, алдағы жазда 300 мыңға жуық қонақ келеді деп күтіледі. Ақша жүзінде жазғы маусым аяқталғаннан кейін экономикалық тиімділік 1,3 миллиард теңгеге жуық соманы құрамақ.