Париж Олимпиадасының күміс жүлдегері Демеу Жадыраев елге оралды
Ол Алматы әуежайына қонды
Париж Олимпиадасында ел намысын қорғаған қазақстандық спортшылардың тағы бір бөлігі елге оралды. Олардың арасында грек-рим күресінен күміс медаль алған Демеу Жадыраев та бар. Бұл туралы Azattyq Rýhy Алматы облысының әкімдігіне сілтеме жасап хабарлайды.
Отандасымызды Алматы әуежайында Алматы облысының әкімдігі, жақындары мен жанкүйерлері, журналистер, Қорғаныс министрлігіне қарасты орталық спорт клубының өкілдері қарсы алды.
Естеріңізге сала кетейік, Париж Олимпиадасында 77 келіге дейінгі салмақта сынға түскен Демеу Жадраев ширек финалда екі дүркін әлем чемпионы, Токио ойындарының күміс жүлдегері қырғызстандық Ақжол Махмудовтан 3:1 есебімен басым түсті.
Ал жартылай финалда әзербайжандық Санан Сүлеймановты 6:1 есебімен жеңді.
Дегенмен финалда отандасымыз жапониялық Нао Кусакадан жеңіліп, күміс жүлдені қанағат тұтты.
