Атырауда балықтардың неден қырылғаны белгілі болды

Әлеуметтік желілердің мониторингі барысында 29 шілдеде Атырау қаласындағы Теплый арнасында балықтың қырылуы туралы ақпарат анықталды. Балық ресурстары мен басқа да су жануарларының қауіп-қатері және (немесе) қырылуы анықталған кездегі өзара іс-қимыл схемасына сәйкес, ҚР АШМ БШ Жайық-Каспий облысаралық бассейндік балық шаруашылығы инспекциясы барлық мүдделі мемлекеттік органдарды хабардар етті, деп хабарлайды Azattyq Rýhy Ауыл шаруашылығы министрлігіне сілтеме жасап.

Осы ақпаратты тексеру үшін балық қырылуының болжамды орнына комиссия жіберілді, оның құрамына мемлекеттік органдардың өкілдері кірді. Балықтың қырылуы туралы ақпарат расталды.

«Теплый арнасы Атырау ЖЭО-на тиесілі, арнадағы судың температурасы 39, 5 градус, оттегінің мөлшері 6 мл/дм3. Су жылу электр орталығының қазандықтары салқындағаннан кейін арнаға түседі және шабындық жерлерді суару үшін қолданылады. Анықтау барысында көктемгі су тасқыны салдарынан Жайық өзені арнасынан асып Соколок арнасына құйылғаны анықталды. Сондай-ақ Соколок арнасынан су тасқыны кезінде сумен бірге балықтар Теплый арнасына құйылған», - делінген хабарламада.

Балықтар қырылуының болжамды себебі Теплый арнасынадағы су температурасының жоғарылауынан суда оттегінің болмауы әсер еткен.

Қырылған балықтың жалпы салмағы-28,5 кг. Атырау облысы бойынша экология департаменті зертханалық зерттеулер үшін су сынамаларын алды.

Жергілікті атқарушы органдармен бірлесіп, санитарлық нормаларды сақтай отырып, қырылған балықты жинау жұмыстары атқарылды.