Қарағанды облысының полицейлеріне 200 жаңа қызметтік көлік берілді
Көліктер қазіргі заманғы стандарттарға сай келеді, байланыс және бейне құрылғылармен және басқа да қажетті құрал-жабдықтармен жабдықталған
Қарағанды облысының полицейлері жаңа қызметтік көлік кілтін алды. Құқық қорғау саласы қызметкерлерінің автопаркі облыстық бюджет есебінен сатып алынған 200 арнайы көлікпен толықты, деп хабарлайды Azattyq Rýhy Polisia.kz-ке сілтеме жасап.
Олардың басым бөлігі патрульдік полицияға беріледі. Трассада қызмет ететін тәртіп сақшылары да жол талғамайтын көліктер алды. Өңір басшысы Ермағанбет Бөлекпаев жаңа техникаларды өзі табыстады.
«Материалдық-техникалық базаны жаңарту облыстағы жедел жағдайды жақсартумен тікелей байланысты. Өңірдегі жағдай тұрақты, қылмыстың алдын алу бойынша ауқымды жұмыстар жүргізіліп жатыр. Қоғамдық тәртіпті сақтау, тұрғындардың қауіпсіздігін қамтамасыз ету үшін алда қолымыздан келгенін жасаймыз», – деп алғысын білдірді Қарағанды облысының полиция департаментінің бастығы Нығмет Исмағұлов.
Полиция департаменті бастығының орынбасары Нұриддин Дауылбаевтың айтуынша, автопарк жыл сайын жаңарады және қызметтік көлік қажеттілігі 85%-ға қамтамасыз етілген.
Сондай-ақ 100 арнайы көлік қалада және трассаларда қызмет ететін патрульдік полицияға берілді. Бұл сонымен қатар қыста қар құрсауында қалып қойған адамдарды құтқару жұмыстарын жеңілдетеді.
Жаңа микроавтобустар тергеу жедел топтың оқиға орнына шығуы үшін кезекші бөлімдерге берілді. Ол өз кезегінде мобильділікті арттырады. Көліктер қазіргі заманғы стандарттарға сай келеді, байланыс және бейне құрылғылармен және басқа да қажетті құрал-жабдықтармен жабдықталған.
