СҚО-дағы Соленое көлінде балықтың қырылуына оттегінің жетіспеушілігі себеп болған
Бұл факті бойынша инспекция көлді пайдаланушыны жауапқа тарту бойынша құжат жинап жатыр
СҚО-дағы Соленое көлінде балықтың қырылуына аэрация жұмысының уақытылы жүргізілмеуі себеп болған. Соның салдарынан су жәндіктері оттегі жетпей, тұншығып өлген, деп хабарлайды Azattyq Rýhy.
«Экология департаменті мен ветеринарлық қызмет балықтың қырылуына не себеп болғанын анықтау үшін көл суының, балық ұшасының сынамасын алды. Бүгінде оның қорытындысы белгілі. Балық қыста оттегінің жетіспеушілігінен қырылған. Бұл факті бойынша инспекция көлді пайдаланушыны жауапқа тарту бойынша құжат жинап жатыр», - дейді Есіл облысаралық бассейндік балық шаруашылығы инспекциясының бөлім басшысы Ильдар Какимов.
Су айдынын «Чекунов» жеке кәсіпкерлігі жалға алған.
Еске сала кетейік, сәуір айында СҚО Есіл ауданы Покровка елді мекенінің маңындағы Соленое көлінен 150 келі өлген тұқы балығы табылған болатын.
