Ақмола облысында демалушы қаза болған тау шаңғысы базасының басшысы 4 жылға сотталды

Ақмола облысында қауіпсіздік ережелерінің сақталмауы салдарынан демалушы қаза болған тау шаңғысы базасының басшысы 4 жылға сотталды. Бұл туралы Ақмола облыстық сотының баспасөз қызметінен мәлім етті, деп хабарлайды Azattyq Rýhy.

Соттың мәліметінше, «Елікті» тау шаңғысы базасы аумағында қызмет көрсеткен ЖШС директоры демалушылардың қауіпсіздігін қамтамасыз етпеген. Бұл абайсызда кәмелеттік жасқа толмаған баланың өліміне (Қылмыстық кодекстің 306-бабы 3-бөлігі) және тағы екі адамның денсаулығына зиян келуіне әкеп соққан (Қылмыстық кодекстің 2-тармағының 306-бөлігі). ЖШС әкімшілігі жасөспірімге қауіпсіздік ережесін түсіндірмей, тау шаңғысы трассасына шығуына рұқсат берген. Салдарынан ол биіктен сырғанау кезінде қоршалмаған ағашқа соғылып, алған дене жарақатынан қаза тапты.

«Сотта жасөспірімнің трассаға нұсқаусыз және қауіпсіздік ережелерін түсіндірусіз шығарылғаны, онда қозғалыс белгілері, қорғаныс торлары, ескерту белгілері, қорғаныс төсеніштері, ағаштардың алдындағы қоршаулар болмағаны анықталды. Сонымен бірге, шаңғы базасында медициналық персонал, күтпеген жағдайлар туындаған кезде іс-қимыл алгоритмі, тау шаңғысы трассасы мен аспалы жолды пайдалануға рұқсат беру құжаттары жоқ болып шықты. Қызмет көрсетуші персонал, нұсқаушылар еңбек қызметін кәсіби даярлықсыз жүзеге асырған. Аспалы жолдың көлбеу бұрышы мен шаңғы жолының көлбеу бұрышы рұқсат етілген мәннен едәуір асып түскен», - делінген хабарламада.

Алайда, ЖШС директоры осы кемшіліктерді жоюдың орнына, қызметін одан әрі жалғастыра берген. Қауіпсіздіктің тиісті деңгейде болмауы салдарынан тағы екі демалушы ауыр дене жарақатын алады. Ауа райының жайсыздығына қарамастан, демалушылардың бірі көтергішпен таудың басына шықпақшы болған. Қатты желден ол көтергіштен құлап, бел омыртқасы сынды. Дәл осындай жағдайды екінші демалушы да бастан өткерді, көтергіштен құлаған ол бүйрегін жарақаттап алды.

«Жаза тағайындау кезінде сот қылмыстық жауапкершілікті жеңілдететін жағдайды, яғни сотталушының жас баласының болуы деп есептеді. Ал құқық бұзушылықтардың қайталануын ауырлататын мән-жай деп таныды. Зеренді аудандық сотының үкімімен тау шаңғысы базасының директорына қызмет көрсету саласында 3 жылға айналысу құқығынан айыра отырып, 4 жылға бас бостандығынан айыру жазасы тағайындалды», - деп хабарлады соттың баспасөз қызметі.

Сонымен бірге, сотталушыдан жапа шеккен екі адамның пайдасына әрқайсысына 10 000 000 теңгеден, қайтыс болған адамның пайдасына 3 000 000 теңгеден моральдық зиян, келтірілген материалдық залал өндіріліп алды.

Бұдан басқа, талапкерлер азаматтық сот ісін жүргізу тәртібімен материалдық залалды өндіріп алу бөлігінде ЖШС-ге азаматтық талап қоюды қанағаттандыру құқығын мойындады. 

Сот актісі заңды күшіне енген жоқ.