Еуропа Одағы алғаш рет Газадағы соғысты тоқтатуды талап етті

Еуропа Одағының елдері Газа секторындағы атысты тоқтатып, жедел гуманитарлық үзіліс жасауға шақырды. Израиль мен ХАМАС арасындағы соғыс басталғаннан бері Венгрия алғаш рет осындай мәлімдемеге қол қойды. Бұл туралы Azattyq Ruhy тілшісі Euronews агенттігіне сілтеме жасап хабарлайды.

Бұл келісім ЕО-ның 27 көшбасшысы арасында бес айға созылған келіспеушіліктен кейін алғаш рет келісімге қол жеткізді.

Брюссель саммитіне қатысушылар «Газадағы апатты гуманитарлық жағдайға және оның бейбіт тұрғындарға әсеріне», сондай-ақ «секторға көмектің жеткіліксіздігінен туындаған ашаршылыққа» өкініш білдірді.

Еуропалық Кеңестің төрағасы Чарльз Мишель, ЕО мемлекеттері мен үкіметтерінің басшылары арасындағы келісімді жоғары бағалады.

ЕО көшбасшылары Израильді Газаның оңтүстігіндегі Рафах аймағына шабуыл жасамауға шақырды. Себебі, бұл қаланы миллионнан астам палестиналық паналап жүр. ЕО сонымен қатар Израильден Нетаньяху үкіметін Газадағы геноцидтің алдын алу үшін шаралар қабылдауға міндеттейтін Халықаралық Соттың маңызды шешімін орындауды талап етті.

Айта кетейік, Бельгия, Ирландия және Испания сияқты ЕО-ға мүше елдер қазан айының соңында атысты тоқтатуға шақырғанымен, Чехия мен Венгрия бұл шақыруды Израильдің өзін-өзі қорғау құқығының қолдауына нұқсан келтіреді деп қорқып, бұғаттады.