Ұлытау облысында электр қуатының тарифі төмендетілді – прокуратура
«Жезқазған электр тарату желісі компаниясы» АҚ 522 млн теңгенің шығындарын растай алмаған
Ұлытау облысында прокуратураның актісі бойынша электр энергиясына тариф төмендетілді, деп хабарлайды Azattyq Ruhy.
Облыс прокурорлары табиғи монополиялар субъектілерінің реттелетін қызметтерге тарифтерді қалыптастыру мен бекіту негізділігіне талдау жұмыстары жүргізді.
«Тексеру нәтижесінде «Жезқазған электр тарату желісі компаниясы» АҚ бекітілген тарифтік сметада көрсетілген 522 млн теңгеден астам сомаға шығындарды растай алмағаны анықталды. Аталған мақсатта электр энергиясымен жабдықтауға облыстың барлық тұрғындарынан түсетін қаражат пайдаланылады», - делінген ведомство хабарламасында.
Прокурорлық қадағалау актісі бойынша Табиғи монополияларды реттеу Комитетінің Ұлытау облысы бойынша департаменті қараша айында «Жезқазған электр тарату желісі компаниясы» АҚ қызметтеріне уақытша өтемақы тарифін енгізді.
«Соның нәтижесінде 2024 жылдың 1 қаңтарынан бастап «Жезқазған электр тарату желісі компаниясы» АҚ тарифі 1 кВтсағ үшін 0,39 теңгеге (4,46 теңге/кВтсағ-тан 4,07 теңге/кВтсағ-қа) төмендетіледі», - делінген хабарламада.
