Қытайда мектеп ғимаратының төбесі құлап, 11 адам мерт болды

Қытайдың солтүстік-шығысында орта мектептің спорт ғимаратының төбесі құлап, 11 адам қаза тапты, деп хабарлайды Azattyq Ruhy.

Қытайдың орталық телеарнасы хабарлағандай, қазіргі кезде билік тергеу жұмыстарын бастап кетті.

Қайғылы оқиға жексенбі күні түстен кейін Цицихар қаласында (Хейлунцзян провинциясы) болған. Үйінді астында барлығы 15 адам қалған, оның төртеуі құтқарылды.

Тергеудің алдын ала мәліметтері бойынша, спорт ғимаратының шатыры жөндеу жұмыстарын жүргізу ережесін бұзу салдарынан зақымданған. Артынша нөсер жауын жауып, соның әсерінен шатыр құлап кеткен.

«Бүгінде құтқару жұмыстары аяқталды. Полицейлер жөндеу жұмыстарын жүргізген компанияның жауапты тұлғаларын ұстады», - делінген хабарламада.