СҚО-да құс фабрикасына ірі көлемде айыппұл салынды
Аталған кәсіпорын былтыр да осындай жауапкершілікке тартылған болатын
Солтүстік Қазақстан облысында «Адель құс» ЖШС-не қатысты ірі көлемде айыппұл салынды, деп хабарлайды Azattyq Ruhy.
«ҚР бәсекелестікті қорғау саласындағы заңнамасын бұзуға қатысты жүргізілген тергеп-тексеру нәтижелері бойынша кәсіпорында ҚР Кәсіпкерлік кодексінде тыйым салынған бағаларды белгілеу және қолдау жөніндегі келісілген іс-қимылдар бөлігінде заңбұзушылық фактісі анықталды», - деп атап өтті Бәсекелестікті қорғау және дамыту агенттігінің хабарламасында.
Агенттік мәліметінше, тергеп-тексеруге СҚО аумағында тауық жұмыртқасын көтерме саудада өткізу бағасын белгілеу және ұстап тұру жөніндегі құс фабрикаларының келісілген іс-әрекеттерінде заңбұзушылық белгілері бар екені туралы хабарлама негіз болған.
«Қызылжар аудандық сотының қаулысымен «Адель құс» ЖШС ҚР Әкімшілік құқық бұзушылық туралы Кодексінің 159-бабының 4-бөлігі бойынша әкімшілік жауапкершілікке тартылып, 2,9 млн теңге көлемінде айыппұл өндіріп алынды», - делінген хабарламада.
Аталған сот актісі заңды күшіне енген жоқ.
Айта кетерлігі, өткен жылдың мамырында аудандық соттың қаулысымен аталған нарық субъектісі осындай заңбұзушылық бойынша жауапкершілікке тартылған болатын.
