Шығынды есептеу, қаржылай сауаттылық, несиеге батпау: «Қарызсыз қоғам» ауыл тұрғындарына нені үйретіп жатыр

«AMANAT» партиясы мен Halyk bank-тің «Қарызсыз қоғам» қаржылық сауаттылықты арттыру жобасы аясында алғашқы оқытулар мамыр айының 2-сі басталды. Осы аралықта ауыл тұрғындарының үшінші легі оқытудан өткен, деп хабарлайды Azattyq Ruhy.

Жоба басталғалы елдің 8 аймағында 6 120 адам оқытылған.

«Ұлы дала» ауылдық бизнесті дамыту қауымдастығының басшысы Ақмарал Бекмұрзаеваның айтуынша, курстан өтуге несиесі бойынша қарызы бар, кәсіпті енді бастаған кәсіпкерлер және көпбалалы, үй шаруасымен айналысатын әйелдер келген.

«Оқытулар Ақтөбе, Алматы, Атырау, Жамбыл, Батыс Қазақстан, Солтүстік Қазақстан, Түркістан және Маңғыстау облыстарында жүзеге асырылды. Курстардан өткендердің 81,5% – ы әйелдер, 18,5% – ы ер адамдар. Кәсіптер бөлінісінде жобаға қатысушылардың 17,3% – бюджет саласының қызметкерлері, 13,6% - кәсіпкерлер, 48,2% – әлеуметтік жәрдемақы алушылар, 15,3% – жұмыссыздар, 5,6% – өзін-өзі жұмыспен қамтығандар. Оқытуға әртүрлі әлеуметтік деңгейдегі азаматтар келіп қатысады. Бұл қаржылық сауаттылық пен еркіндік тікелей адамның табысына байланысты емес екенін көрсетеді. Біз осы оқыту барысында қатысушыларға млн теңге тауып, қарызға батқандар да бар екенін, аз жалақымен ақша жинап, үй алып жатқандардың да бар екенін көрсетіп, түсіндіріп жатырмыз», - деді Бекмұрзаева.

Ол атағандай, оқу процесі барысында қатысушыларға қаржы мамандарының дәрістерінен бөлек, заңгерлерден де көмек беріледі. Олар әр қарыз алушының несиелік тарихын жеке зерттейді және қарыз жүктемесін жеңілдету бойынша нақты кеңестер береді.

«Әр адам өз шығындарының есебін жүргізіп отыруы керек. Сондай-ақ, дүкендерге азық-түлікке барғанда тізім жасап шығу керек. Осындай қарапайым тетіктер арқылы адам өзінің қаражатын басқара алады. Бізге оқуға келген адамдар «маған не үйретесің, одан да ақша беріңдер» деп айтады. Бірақ лотерея ұтып алған бірде-бір адам өмірінің соңына дейін бай-қуатты болмады. Уақыт өте келе, сол бұрынғы жағдайына оралды. Сондықтан, қаржылық сауаттылық тұрақты әрі қауіпсіз өмірдің кепілі болып есептеледі», - деді Ақмарал Бекмұрзаева.

Ал Halyk bank-тің Астана қалалық филиалының директоры Жанар Рақымова елімізде мұндай оқыту алғаш рет ұйымдастырылып отырғанын айтты.

«Кейбір азамат қарызға батып, өмір сүру жағдайын ушықтырып алады. Сондықтан, осындай оқытулар адамдарға бюджетті басқаруға үйретеді. Біздің банктің жұмысшылары осындай сабақтарға қатысып, тұрғындардың сұрақтарына жауап береді. Біз ірі банк ретінде тұрғындардың төлем қабілеті жоғары болғанын қалаймыз. «AMANAT» партиясымен жүзеге асырып жатқан бұл жобаның нәтижесінде халықтың қаржылық сауаттылығы артады деп үміттенеміз», - деді ол.

 «Ұлы дала» ауылдық бизнесті дамыту қауымдастығының сарапшысы Әйгерім Рысбаеваның айтуынша, қарыздану деңгейін бойынша ең жоғары көрсеткіш Маңғыстау облысында тіркелген.

Оқытудан өтуді қалаған тұрғындар «AMANAT» партиясының филиалдарына жүгіне алады.

Айта кетейік, ақпан айында «AMANAT» партиясы ауыл тұрғындарының қаржылық сауаттылығын арттыру мақсатында Halyk bank- пен бірге «Қарызсыз қоғам» жобасын іске қосақан болатын.