Павлодарда балаға қол көтерген тәрбиеші жұмыстан шығарылды

Павлодарда балабақшалардың бірінде баланы шапалақпен ұрған тәрбиеші жұмыстан босатылды, деп хабарлайды Azattyq Rýhy Pavlodarnews.kz-ке сілтеме жасап.

Әлеуметтік желіде балабақшада түсірілген видео таралды. Бейнекадрдан тәрбиешінің баланы шапалақтап, көрпемен жауып жатқанын көруге болады.

«Бұл 28 балабақша. Мұндай адамды бүкіл қала білуі тиіс», - деп видеоның астына пікір жазылған.

Ата-аналардың бірі балабақшада көптен бері жөндеу жүргізілмегені туралы жазған.

«Біздің балабақшада ата-аналардың қатысуымен Наурыз мерекесін тойлауға рұқсат берілмеді. Енді міне, балабақшамен қоштасу кеші де болмайтыны  туралы сөз қозғалуда. Топта өте суық, балалар қыстың күні көрпемен ұйықтайды. Екі жылытқыш қосылып тұрады», - дейді  желі қолданушысы.

Павлодар қаласының білім беру бөлімі балаларға дөрекілік таныту фактісі бойынша №28 балабақшада қызметтік тергеу жүргізілгенін хабарлады.

«Тергеу қорытындысы бойынша ҚР Еңбек кодексінің 52-бабы 1-тармағының 14-тармақшасына сәйкес тәрбиеші теріс себептермен жұмыстан шығарылды», - деп хабарлады білім беру бөлімінде.

Сондай-ақ тәрбиешілердің қызметін бақылауды әлсіреткені үшін мектепке дейінгі ұйым басшысына қатысты тәртіптік жаза қолданылған.