Көкшетауда полиция басқармасы бастығының орынбасары сотталды
Оған алаяқтық және пара беруге итермеледі деген айып тағылған
Көкшетау полиция басқармасы бастығының орынбасары алаяқтық және пара беруге итермелегені үшін сотталды, деп хабарлайды Azattyq Ruhy.
27 наурызда Көкшетау қалалық соты Көкшетау қаласының полиция басқармасы бастығының орынбасары, полиция майоры М-ге қатысты айыптау үкімін жариялады.
«Полиция қызметкері кәсіпкердің 49 700 АҚШ доллары көлеміндегі ақшалай қаражатын алаяқтық жолмен иемденгені және оны басқа орган тергеп жатқан қылмыстық істі тоқтату үшін пара беруге итермелегеніне кінәлі деп танылды», - делінген хабарламада.
Ол қауіпсіздігі орташа түзету мекемесінде жазасын өтеуге 8 жыл 6 айға бас бостандығынан айырылып, өмір бойы мемлекеттік қызметте және квазимемлекеттік сектор субъектілерінде қызмет атқару құқығынан, сондай-ақ «полиция майоры» арнайы атағынан айырылды.
Үкім заңды күшіне енген жоқ.
