Жеке тұлғалардан банкроттыққа өтінім қабылдау процедурасы дайын және ол шексіз болады
Құжат қабылдау мерзімі бойынша мемлекет шектеу қоймайды
Жеке тұлғалардан банкроттыққа өтінім қабылдау процедурасы толық дайын және ол шексіз болады. Бұл туралы Орталық коммуникациялар қызметінде Қаржы вице-министрі Ержан Біржанов мәлім етті, деп хабарлайды Azattyq Ruhy.
«Қаржы министрлігі мен өзге де мүдделі мемлекеттік органдар 3 наурыздан бастап өтінім қабылдау үшін тиісті процедураны толықтай дайындады. Бірден айта кетейін, жеке тұлғалардың банкроттығын жүзеге асыру мерзімі жоқ. Елімізде бұған дейін жүргізілген автокөліктерді, капиталды заңдастырумен салыстырғанда, заңның кезеңі бойынша қандай да бір шектеу жоқ»,- деп мәлім етті Біржанов.
Яғни, ол банкроттыққа құжат қабылдау күні ашылғанда халық жапатармағай өтініш беруге асықпай, жағдайды жан-жақты ойланса дейді.
«Құжат қабылдау мерзімі бойынша мемлекет тарапынан ешқандай шектеу болмайды», - деді ол Орталық коммуникациялар қызметіндегі баспасөз мәслихатында.
