Ресей АҚШ-пен ядролық қаруды азайту туралы өзара келісімді уақытша тоқтатады

Владимир Путин Ресей мен АҚШ арасындағы ядролық қарусыздану туралы қолданыстағы соңғы келісім – стратегиялық шабуылдаушы қару-жарақ туралы шартқа (СНВ-III) өз елінің қатысуын біржақты тоқтата тұру туралы шешімін жариялады, деп хабарлайды Azattyq Ruhy агенттігі Еuronews.com-ға сілтеме жасап.

Ол АҚШ пен НАТО-ның Украинаға қолдау көрсетіп, сонымен бірге Ресейдің стратегиялық тұрғыдан жеңілгенін қалайтынын ескергендіктен осындай шешім қабылдағанын алға тартты. Путин Ресей Федерациясы Батыс инспекторларын өз нысандарына жібере алмайтынын ашық айтты.

«Олар бізді стратегиялық жеңіліске ұшыратқысы келеді. Содан кейін ядролық қондырғыларымызға араласпақшы. Сол себептен бүгін Ресей стратегиялық шабуыл қарулары туралы шартқа қатысуын тоқтата тұрғанын мәлімдеуге мәжбүр», - деді Путин.

НАТО-ның Бас хатшысы Йенс Столтенберг бұған жауап ретінде Ресейге ешкім шабуыл жасамайтынын және НАТО Мәскеудің шешіміне өкінетінін айтты.

«Ресей шапқыншылығы басталғаннан кейін бір жыл өткен соң президент Путиннің бейбітшілікке деген ешбір қадамын көріп отырған жоқпыз. Керісінше, ол  бүгін анық жаңа соғысқа дайындалып жатқанын айтып отыр. Ресей жаңа шабуылдарды бастайды, көбірек әскер жұмылдырады және онымен қоймай, Солтүстік Корея мен Иранды да тартады», - деді ол.

Ал АҚШ мемлекеттік хатшысы Энтони Блинкен Мәскеудің шешімдеріне сәтсіз әрі жауапкершіліктен жұрдай деген баға берді.

Айта кетейік, стратегиялық шабуыл қару-жарақ туралы келісімге (SNV) АҚШ пен Ресей арасында 2010 жылы қол қойылды, 2021 жылы ол бес жылға , яғни2026 жылға дейін ұзартылды.

Құжат Ресей мен АҚШ үшін ядролық оқтұмсықтардың, құрлықаралық баллистикалық зымырандар мен алысқа ұшатын бомбалаушылардың санын шектеуді қарастырады. Осылайша, бақылаусыз қару-жарақ жарысын тоқтатады.