Желтоқсанда коронавируспен сырқаттану екі есеге көбейген - Айжан Есмағамбетова

Желтоқсан айында елімізде коронавируспен сырқаттану екі есеге көбейген. Бұл туралы Денсаулық сақтау вице-министрі Айжан Есмағамбетова Орталық коммуникациялар қызметінде өткен брифингте айтты, деп хабарлайды Azattyq Ruhy.

«Әлемнің 65-тен астам елінде коронавирустың «цербер» нұсқасы анықталған. Оның «омикронның» жеңіл түрлерінен айырмашылығы жоқ. Қазақстанда желтоқсанда қарашамен салыстырғанда сырқаттану 2,4 есеге өскен. Тәулігіне орташа санағанда 300 жағдайға дейін тіркеліп жатыр. Эпидемиологиялық жағдайға сәйкес, тамыздан бастап барлық өңір «жасыл аймақта» орналасқан. Бірақ R көрсеткішінің 1 бірлектен жоғары болуы 13 өңірде байқалып отыр. Бұл инфекцияның таралуы өскенін көрсетіп отыр», - деді ол.

Айжан Есмағамбетова R көрсеткіші бойынша «жасыл аймақта» болса да, халық көп жиналатын жерде маска тағу ұсынылатынын айтты.

«Өңірлер «сары аймаққа» көшкен жағдайда ұжымдарды бір-бірімен ажыратуға қатысты іс-шаралар қабылданады. Өңір «қызыл аймаққа» көшкен кезде жиналыстарды онлайн форматқа көшіріп, көліктің барлық түрі мен үй-жайларда масқа тағу, қызметкерлердің 30 пайызын қашықтан жұмыс істеуге көшіру сынды шектеулер қабылданады», - деді Айжан Есмағамбетова.