Ұлытау облысында адасып кеткен шопандар аман табылды
Шопандар медициналық көмекке мұқтаж емес, барлығы дін-аман
Ұлытау облысында ауа райының қолайсыздығынан қыстақты таба алмай адасып кеткен шопандар аман табылды, деп хабарлайды Azattyq Ruhy.
«Жаңаарқа ауданының «Бірлік» шаруа қожалығынан 3 адам мал жаюға шығып, кешкі уақытта үйге оралмаған. Олармен байланыс орнату мүмкін болмағандықтан кешкі сағат 20:30-да адамдардың жоғалғаны туралы полицияға хабарлаған», - деп көрсетті Ұлытау аудандық ТЖД баспасөз қызметі.
Құрамында 5 адам №6 өрт сөндіру бөлімі №5 борты қыстауға аттанды. Мамандар қыстауға жеткенше шаруа қожалығы қызметкерлері екі қойшыны өздері іздеп тапқан. Олар зардап шеккен жоқ және медициналық көмекке мұқтаж емес.
Тағы бір шопанды іздеу жалғасып, сағат 00:15-те үшінші адам «Қараш» қыстауының жанынан табылған.
