Еуропада ауа райы қолайсыздығынан қиындықтар туындады

Ұлыбританияда қалың қар жауып, күн суытты. Соның салдарынан қалаларда көлік қозғалысы қиындай түсті. Елдің кейбір ауданында ауа температурасы минус 10 градусқа дейін төмендеді, деп хабарлайды Azattyq Ruhy агенттігі Euronews-ке сілтеме жасап.

Ауа райы қызметі Англияның оңтүстік-шығысы мен оңтүстік-батысында, сондай-ақ Шотландияның солтүстігінде қар, тұман және аяз туралы ескертулер шығарды. Лондон Стэнстед әуежайы рейстердің кешігетіні туралы ескертті.

Сонымен қатар Польша аумағында қалың қар жауды, бұл автомобиль және теміржол байланысын қиындатты. Көптеген автобус пен пойыздар кешіктірілді. Полиция жол-көлік оқиғаларының көбейгенін хабарлады.

Синоптиктердің болжауынша, қар жауғаннан кейін елде бірден күн суытқан. Ака температурасы 10-15 градусқа дейін, түнде нөлден 20 градусқа дейін төмендеді.

Қатты қарлы боран Эстонияға да жетті. Синоптиктер ауа райының төтенше жағдайын білдіретін екінші деңгейдегі дауыл туралы ескерту жасады. Дүйсенбіде таңертең қардың, желдің және мұзды жаңбырдың салдарынан 10 000-нан астам үй-жай электр қуатынсыз қалды. Жол қозғалысы қиындап, әуежайларда рейстер тоқтатылады.

Ал Босния мен Хорватия жаңбырдан туындаған су тасқынынан зардап шегуде. Ондаған үй мен жолдар су астында қалды. Егер жауын-шашын тоқтамаса, билік тұрғындарды эвакуациялауы мүмкін екенін жоққа шығармайды. Боснияда көшкін салдарынан қала маңында бір адам қайтыс болды.