Ақмола облысында баламды емдетемін деп жалған хабарламамен ақша жинаған күдікті ұсталды

Ақмола облысында қайырымдылықты пайдаланып, алаяқтық әрекетке барған күдікті қолға түсті, деп хабарлайды Polisia.kz.

Ақмола облысы ПД Криминалдық полиция басқармасының қызметкерлері Алматы қаласының 35 жастағы тұрғынының өтініші бойынша бұрын жасалған қылмысты ашты.

Өтініш берушінің айғақтары бойынша, оған белгілі блогер ретінде Ақмола облысының тұрғыны хабарландыру жариялауды сұраған. Әйел блогерге баланы емдеу үшін қаржы қажет екенін түсіндіріп, банк картасының нөмірін берген. Instagram әлеуметтік желісінде хабарландыру жарияланғаннан кейін және ақша түскен соң Щучинск тұрғыны өзі туралы жалған ақпарат бергені әрі оның балалары жоқ екендігі белгілі болды.

Жедел-іздестіру іс-шаралары барысында күдікті анықталды, ол Щучинск қаласының 22 жастағы тұрғыны болып шықты. Қазіргі уақытта осы факті бойынша сотқа дейінгі тергеу аяқталды. ҚР ҚК 190-бабының 3-бөлігі «Алаяқтық» бойынша қылмыстық іс сотқа жіберілді.