Ақмола облысында қазандық үйінділерінің астынан от жағушы құтқарылды

Оқиға Ақмола облысы Аршалы ауданының №3 мектебінде болды, деп хабарлайды Azattyq Ruhy.

Қазандықтың жарылуы мен оның құлауы нәтижесінде үш жұмысшы ауруханаға жатқызылды, олардың біреуін құтқарушылар үйінділердің астынан шығарды.

Олар: 1983 жылы туған шаруашылық меңгерушісі, 1990 жылы туған электр маманы және 1967 жылы туған от жағушы.

№3 жалпы білім беретін мектепте 395 бала оқиды. Мектептің барлық оқушылары дереу эвакуацияланды. Қазіргі уақытта мектеп қашықтан оқытуға ауыстырылды. Балалар мен мұғалімдер арасында зардап шеккендер жоқ.

Ақмола облысы әкімінің бірінші орынбасары Малғаждар Тәткеевтің төрағалығымен жедел штаб құрылды. Тарату жұмысына барлық қызмет қатысады. Оқыс оқиғаның салдарын жою және жылу беру бойынша жедел шаралар қабылданып жатыр.

Ақмола облысы білім басқармасының ақпараты бойынша 2014 жылы екі қазандық ауыстырылған. Өткен қарашада мұржаны ауыстыру жұмыстары жүргізілді.

Оқиға орнында ТЖД-ның 8 қызметкері мен бір техника, жергілікті атқарушы органдардың 15 адамы мен екі техника, аудандық полиция бөлімінің 5 қызметкері және бір техника, жедел медициналық жәрдем бригадасы жұмыс істеді.