Нокаутпен жеңілген қазақстандық боксшылар

Сайыста жеңіс пен жеңіліс те қатар жүретіні белгілі. Спорттық карьерасында ешкімге есе бермеген спортшылардың өзі сүрінуі мүмкін. Десе де бұл олардың әлсіздігі немесе тәжірибесіздігінің көрінісі емес. Кей спортшылар дайындығының аздығынан жеңілсе, енді бірі төрешілердің қателігінен болып жатады. Бұған дәлел – жақында ғана ауыр нокаут алған Айдос Ербосынұлы. Қазақстандық боксшының Давид Моррелден жеңілгеннен кейін жағдайы күрт нашарлағанын барлық БАҚ жарыса жазды. Ауыр соққы алған спортшы біден комаға түскен. Қазір боксшы есін жиғанымен денсаулығына әлі де қауіп бар.

Белгілі инсайдер Дэн Рафаэль Айдосты Хеннепин округінің медициналық орталығына дәрігерлік тексеру жасау үшін алып кеткенін, боксшы ауруханаға миына қан кеткен соң медикаментозды жағдайда жеткізілгені туралы мәлімдеме жасады. Қазір жанкүйер қауым спортшының тезірек сауығып кетуін тілеп отыр.

Azattyq Ruhy тілшісі осы жағдайдан соң бүгінге дейін жарқын жеңісімен жұрт ішінде танылып жүріп нокаутқа түскен қазақстандық боксшыларға шолу жасап шықты.

ИВАН ДЫЧКО

Ауыр салмақтағы танымал спортшының әуесқой бокста нокаут алғаны дүйім жұрттың есінде. Боксшы Алматыда өткен әлем чемпионатының финалында нокаутпен жеңілді.

Финалда 91 келіден астам салмақ дәрежесінде Дычко әзербайжандық Магомедрасул Меджидовпен қолғап түйістірді. Ринг қожайыны қарсыласына қарағанда бойының ұзындығын пайдаланып, өзіне жақындатпай соққыларын дәл тигізіп жүрді. Меджидов екеуінің арасындағы қашықтықты бұза алмай алғашқы екі раундта ұпай бойынша жеңіліп жатқан болатын. Алайда соңғы раундта әзербайжандық боксшы Дычконың осал тұстарын тауып, соққыларының астына алды. Осылайша ол алдымен қазақстандық боксшыны нокдаунға жіберді. Әзербайжандық осы қарқынын жоғалтпай, есін жиып, орнынан енді тұрған Дычконы жойқын соққысымен нокаутқа жіберді. Осылайша Қазақстан құрамасының өкілі қолда тұрған алтын жүлдесінен айырылып қалды. Атақты қазақстандық боксшының ұзыннан құлаған сәтін бокс жанкүйерлері біраз уақыт талқылады.

БОКСШЫЛАР АЛҒАШ РЕТ АЛТЫНСЫЗ ҚАЛДЫ

Елімізде дамығын спорт түрі бокс екені белгілі. Сәйкесінше аталған спорт түріне қызығушылық танытатындардың қатары да көп. Десе де Токиода өткен Олимпиада ойындарында Қазақстан құрамасы бокстан алғаш рет алтын медальсыз қайтқанын білеміз.

Токио Олимпиадасында 91 келіге дейін салмақта бақ сынаған Василий Левит алғашқы кездесуінде нокаутқа түсті. Жарысты екінші айналымнан бастаған Левит испаниялық Эммануэль Рейеспен кездескен болатын. Жекпе-жектің бірінші раунды 3:2 есебімен испаниялық боксшының пайдасына шешілсе, екінші раундта ұрымтал сәттердің бірінде қарсыластың ауыр соққысын өткізіп алған Левит нокаутқа түсті. Осылайша, Рио Олимпиадасының күміс жүлдегері жарыс жолынан шығып қалды.

Естеріңізге сала кетсек, Токиодағы 2020 жылғы Олимпиадаға Қазақстан атынан 9 боксшы сынға түсіп, олардың сегізі ерлер арасында және біреуі әйелдер арасында бақ сынады. Токио Олимпиадасына барған тоғыз қазақстандық боксшының бесеуі жеңіліп, жарыс жолынан шығып қалған еді. Жеңілгендердің арасында әлем чемпионы Бекзат Нұрдәулетов те бар болатын.

БАТЫРЖАН ЖҮКЕМБАЕВ

Батыржан Жүкембаев – кәсіпқой рингте бірінші жартылай орта салмақ дәрежесінде ел намысын қорғап жүрген боксшы.

2021 жылы бірінші жартылай орта салмақтағы отандасымыз 29 жастағы Пуэрто-Рикодан Сабриэль Матиаспен жұдырықтасып, нокаутпен жеңіліп қалды. Жекпе-жек Лос-Анджелесте өтті. Ал Батыржан Жүкембаев АҚШ аумағында алғашқы жекпе-жегін өткізді. Ал осыған дейінгі жекпе-жектерінің бәрін Канадада өткізіп келген болатын.

Бұл жекпе-жек 12 раундқа есептелген. Төртінші раундта Пуэрто-Рико Жүкембаевты нокдаунға жіберді. Сегізінші раундтан кейін қазақстандық спортшының бұрышы жекпе-жекті жалғастырудан бас тартты. Мұндағы басты себеп – спортшының денсаулығы болды.

Матиас қауіпті панчер болып саналады. Кәсіпқой бокста осыған дейін 17 жекпе-жектің 16-сында мерзімінен бұрын жеңіске жетті. Ол 2019 жылы өзіне қатысты қайғылы оқиғадан кейін танымал болды. Онымен жекпе-жекке шыққан ресейлік боксшы Максим Дадашев медициналық комаға түсіп, аяғында алған жарақаттарынан жүрегі шыдамай қайтыс болған болатын.

КАРЬЕРАСЫНДАҒЫ АЛҒАШҚЫ АУЫР ЖЕҢІЛІСІ

Ауыр салмақта өнер көрсететін тағы бір қазақстандық боксшы Уәлихан Бисенқұл (9-1, 9 КО) кәсіпқой рингте алғашқы рет жеңілді. Мәскеудегі бокс кешінде 29 жастағы Бисенқұл ресейлік Артур Саркисянмен (6-7, 4 КО) жұдырықтасқан болатын. Боксшылар бірінші ауыр салмақта IBA Asia тұжырымы бойынша әлем чемпионы титулын сарапқа салған.

Кездесу бас-аяғы он раундқа жоспарланған еді. Алайда үшінші раундта Саркисян сол қолымен қазақстандыққа жойқын соққы жасап, ауыр нокаутқа түсірді. Осылайша, Бисенқұл өз карьерасында алғаш рет жеңілді. Отандасымыз осыған дейінгі тоғыз кездесуінің бәрін нокаутпен аяқтаған болатын.