Қарағанды облысында катодты мыс шығаратын зауыт іске қосылды
Зауыт екі жыл бойы салынған
Қарағанды облысы Ақтоғай ауданындағы жаңа гидрометаллургия зауытында жылына 5 мың тоннаға дейін катодты мыс шығарылатын болады, деп хабарлайды Azattyq Ruhy.
Кәсіпорында 140 жұмыс орны құрылды.
Борлы кен орнындағы "Irkaz Metal Corporation" ЖШС өз жұмысын бастады.
«Катодты мыс SX-EW инновациялық технологиясы бойынша шығарылады. Бұл гидрометаллургиялық процесс Қазақстанда соңғы он жылда қолданылып келеді. Оның бірнеше маңызды артықшылықтары бар: зауыттар салу үшін үлкен шығындарды қажет етпейді, катодты мыс өндіруде өзіндік құны төмен, кедей кендердің қорларын пайдалануға болады», - делінген облыс әкімдігінің хабарламасында.
Қолданылатын технология металлургиядағы ең экологиялық технологиялардың бірі болып табылады. M00k маркасына сәйкес келетін жоғары тазалық пен сапаға ие өнімдерді шығаруға мүмкіндік береді.
