20 цистерна мұнай өнімдерін елден заңсыз шығармақ болғандар ұсталды
Олар сұйық отынды еріткіш зат ретінде көрсеткен
«Жайық» темір жол өткізу пунктінде еліміздің аумағынан мұнай өнімдерін заңсыз шығармақ болғандар ұсталды. Бұл туралы ҚР Ұлттық қауіпсіздік комитетінің баспасөз қызметі мәлім етті, деп хабарлайды Azattyq Rýhy.
«2022 жылғы 8-11 қазан аралығында ҰҚК Шекара қызметі Батыс Қазақстан облысының «Жайық» темір жол өткізу пунктінде еліміздің аумағынан мұнай өнімдерін заңсыз шығарудың алдын алды. Жағар май тиелген 20 теміржол цистернасы битумдық лактарды еріткіш «Уайт-спирит» ретінде көрсетіліп, жүкке арналған темір жол құрамдарымен тасымалданған», - делінген хабарламада.
Мәліметке сай, ұсталған жүк құзыреті бойынша процессуалдық шешім шығару үшін Батыс Қазақстан облысы бойынша Мемлекеттік кірістер департаментіне берілген.
Шекара қызметі Қазақстандағы бензин, дизель отыны мен мұнай өнімдерінің жеке түрлерінің шығарылуына уақытша шектеулер қойылғанын еске салады.
