Ол Мемлекет басшысының жарлығымен Сауда және интеграция министрі қызметінен босатылған болатын
Жоғарғы Еуразиялық экономикалық кеңестің шешімі бойынша Бақыт Сұлтанов Еуразиялық экономикалық комиссия Коллегиясының мүшелігіне тағайындалды, деп хабарлайды Azattyq Ruhy.
«Жоғарғы Еуразиялық экономикалық кеңестің 6 қазандағы шешімі бойынша Бақыт Сұлтанов Қазақстан Республикасынан Еуразиялық экономикалық комиссия Коллегиясының жаңа мүшесі (Министрі) болып тағайындалды. Оның құзыретіне Еуразиялық экономикалық одақтың трансшекаралық нарықтарындағы бәсекелестік және антимонополиялық реттеу мәселелері кіреді», - делінген ұйымның баспасөз хабарламасында.
Бақыт Сұлтанов ҚР Статистика агенттігінің төрағасы, Қаржы вице-министрі, Экономика және бюджеттік жоспарлау министрі қызметтерін атқарды.
Сондай-ақ Президенттің көмекшісі, ҚР Президентінің Әкімшілігі Басшысының орынбасары, Премьер-Министрдің орынбасары болды.
Еске салсақ, 15 тамыз күні Мемлекет басшысының Жарлығымен Бақыт Тұрлыханұлы Сұлтанов ҚР Премьер-министрінің орынбасары – Сауда және интеграция министрі лауазымынан босатылған болатын.