Солтүстік Корея Жапон теңізіне қарай тағы да зымыран ұшырды
АҚШ-тың тұрақты өкілі Пхеньянға қарсы санкция режимін күшейтуге шақырды
Солтүстік Корея Жапон теңізіне қарай тағы екі баллистикалық зымыран ұшырды. КХДР СІМ мәлімдегендей, Пхеньян АҚШ пен оның одақтастарының Корей түбегі аймағындағы әрекеттеріне байланысты өз қауіпсіздігін қамтамасыз ету үшін қажетті шараларды қабылдауда.
БҰҰ Қауіпсіздік Кеңесінің шұғыл отырысында АҚШ-тың тұрақты өкілі Линда Томас-Гринфилд Пхеньянға қарсы санкция режимін күшейтуге шақырды.
«Біз БҰҰ-ға мүше барлық мемлекеттерді, әсіресе Қауіпсіздік Кеңесінің мүшелерін осы абайсыз мінез-құлықты айыптауға қосылуға және КХДР-ді заңсыз қару-жарақ бағдарламаларынан толық, тексерілетін және қайтымсыз түрде бас тартуға және дипломатияны ядролық қарудан арылту бағытында пайдалануға шақырамыз», - деді АҚШ-тың БҰҰ жанындағы Тұрақты өкілі Линда Томас-Гринфилд.
Соған қарамастан, отырыс нәтижесіз аяқталды. Ресей мен Қытай АҚШ-тың мәлімдемесіне жауап ретінде Вашингтонды аймақтағы қақтығысты күшейтудің орнына татуласу жолына түсуге шақырды.
