Әулиекөл ауданындағы ірі табиғи өрт толықтай сөндірілді

2022 жылғы 10 қыркүйекте сағат 10:00-де Қостанай облысының Әулиекөл ауданындағы орман өрті толықтай сөндірілді, деп хабарлайды Azattyq Ruhy тілшісі.

Еске сала кетейік, 2 қыркүйекте сағат 15: 10-да Әулиекөл ауданының Басаман және Семиозер орман шаруашылығы басқармаларының аумақтарында ағаштар мен құрғақ шөптер өртенген болатын.

Өрт аумағы 43 мың гектардан асты. Екі елді мекендегі 91 тұрғын үй жанып кетті.

Қазір эвакуацияланғандар үйлеріне оралды, қалғандары туыстарының баспанасын паналауда. Өрт басталғаннан бері барлығы 2 091 адам эвакуациялан болатын.

12 адам өрт кезінде жеңіл және орташа ауырлықтағы жарақаттар, күйіктер алып, уланды. Бүгінде зардап шеккен 3 адам Әулиекөл аудандық ауруханасында ем қабылдап жатыр.

1935 жылы туған бір адам қаза тапты.

Жедел штаб жұмысы басталғаннан бері ТЖМ жедел желісіне 38 қоңырау келіп түсті. 87 азаматқа консультациялық-психологиялық көмек көрсетілді, 45 баламен топтық психологиялық жұмыс жүргізілді.

Тікұшақтар әуеден 327 рет су шашты.

Оқиға орнында Басаман және Семиозер орман шаруашылығы басқармасы  73 адам және 21 бірлік техникадан құрылған күштері мен құралдары қалып отыр.

Жедел штаб өз жұмысын аяқтады.