Түркістан облысындағы жекеменшік балабақшада баланы ұрып-соғып жатқан сәттің видеосы тарады

Әлеуметтік желіде Түркістан облысындағы жекеменшік балабақшада баланы ұрып-соғып жатқан сәттің видеосы тарады, деп хабарлайды Azattyq Ruhy тілшісі.

ҚР Оқу-ағарту министрлігінің мәліметінше, оқиға Шардарадағы жекеменшік балабақшада болған. Видеода тәрбиеші алдымен ұл баланы жұлқып, басынан әбден ұрып-соғады, кейіннен екі қыз баланы шақырып, балалар арасындағы кикілжіңге араласып, кек алуға мәжбүрлейді.

«Шардара қаласында орналасқан жекеменшік бөбекжай балабақшасындағы тәрбиешінің баланы ұрғаны жөнінде WhatsApp-тағы бейне жарияланым бөлімге 2022 жылдың 5 қыркүйегі күні сағат 14:00 шамасында белгілі болды. Түркістан облысы Шардара ауданының адами әлеуетті дамыту бөлімі арнайы комиссия тобын құрып, зерделеу жұмыстары жүргізілді. Нәтижесінде, баланы ұрған  тәрбиешісі екені белгілі болды. Қазіргі таңда тәрбиеші уақытша жұмыстан шеттетілді. Бөлім тарапынан 05.09.2022 жылғы №06/10-4/234 санды хатпен Шардара ауданының полиция бөліміне тиісті жұмыстарды жүргізуге ықпал жасау жөнінде хат жолданды. Бүгінгі таңда алдын ала анықтау-тергеу амалдары жүргізілуде», - деп мәлімдеді ҚР Оқу-ағарту министрлігінің баспасөз өкілі Мөлдір Әбдуалиева.