Бұл мәселе Президенттің жеке бақылауында
ҚР Премьер-министрі Әлихан Смайылов Қостанай облысындағы ауқымды табиғи өрттердің салдарын жою мәселелері бойынша жедел кеңес өткізді, деп хабарлайды Azattyq Rýhy Премьер-министрдің ресми сайтына сілтеме жасап.
Төтенше жағдайлар жөніндегі бірінші вице-министр Ибрагим Күлшімбаев күрделі метеорологиялық жағдайға, оның ішінде 36 градустан жоғары ауа температурасына байланысты Қостанай облысында, әсіресе орман алқаптарында күрделі өрт жағдайы қалыптасқанын баяндады. Өрт 43 мың га орман алқабын шарпыды.
Қазіргі уақытта 1841 адам қауіпсіз жерге көшіріліп, ыстық тамақпен қамтамасыз етілді. Жедел желі ашылып, психологтардың жұмысы ұйымдастырылды. 10 адам зардап шекті, бір адам қайтыс болды.
Отпен 108 құрылыс жойылып, бүлінген. Өрттерді сөндіруге жеке құрамнан 600-ден астам адам және 100-ге жуық бірлік техника қатысады. Тікұшақтар іске қосылды. Жедел штаб жұмыс істейді, оқиға орнында ҚР ТЖМ басшысы бар.
Премьер-Министр Төтенше жағдайлар, Индустрия және инфрақұрылымдық даму, Ауыл шаруашылығы, Қаржы министрліктеріне және Қостанай облысының әкімдігіне тұрғындар мен ауыл шаруашылығына келтірілген залалды бағалауды тапсырды.
Қаржы және Ұлттық экономика министрліктеріне Үкіметтің резервінен өрттен келтірілген залалды өтеуге қаражат бөлу туралы қаулы жобасын дайындау тапсырылды.
Сонымен қатар, Әлихан Смайылов тұрғын үйінен айырылған азаматтар үшін жаңа тұрғын үйлердің құрылысы бойынша жұмыстарды дереу бастауды тапсырды.
"Құрылысты қысқа мерзімде аяқтау үшін жедел жұмыс істеуіміз керек. Бұл мәселе Президенттің жеке бақылауында", - деді Әлихан Смайылов.
Сонымен қатар, Индустрия және инфрақұрылымдық даму министрлігіне Қостанай облысының зардап шеккен аудандарында көлік қатынасын қалпына келтіруді және барлық инженерлік және инфрақұрылымдық объектілердің үздіксіз жұмыс істеуін қамтамасыз ету тапсырылды.
Ауыл шаруашылығы министрлігіне облыс әкімдігімен бірлесіп, қажет болған жағдайда зардап шеккен фермерлерге және жеке қосалқы шаруашылық иелеріне көмек көрсету тапсырылды.
Сондай-ақ, Әлихан Смайылов Денсаулық сақтау министрлігіне зардап шеккендерге қажетті медициналық көмек көрсетуді, Еңбек министрлігіне облыс әкімдігімен бірлесіп зардап шеккен халыққа әлеуметтік көмек көрсетуді, Ішкі істер министрлігіне эвакуация аймақтарында азаматтардың қоғамдық қауіпсіздігін және мүлкінің сақталуын қамтамасыз етуді, сонымен қатар отты абайсыз пайдаланғаны үшін жауапкершілік туралы халық арасында түсіндіру жұмыстарын күшейтуді тапсырды.