Қаржы пирамидасы блогер Мейіржан Төребаевқа 2 млн теңге қарыз – адвокат

Қаржы пирамидасын жарнамалады деген күдікпен уақытша қамауда отырған блогер Мейіржан Төребаевтың адвокаты Жанна Оразбахова істі тергеу барысында жасалған сараптама қорытындысын желіге жүктеді, деп хабарлайды Azattyq Ruhy.

Оның айтуынша, «тергеу олардың дәйегіне назар аудармайды, сондықтан авдокат ақпараттық кеңістіктің көмегіне жүгініп отыр».

«Бірнеше күн ішінде Мейіржанның кінәсіз екенін дәлелдейтін хаттар мен аудиожазбалар жариялаймын. Ол дәлелдер Мейіржан кінәсіз ғана емес, өзгелер сияқты зардап шегіп отырған адам екенін айқындайды. Ал әзірге, істі тергеу барысында жасалған сараптама қорытындысын көрсетейін. Бір емес, төрт сарапшы жасаған. Олардың бәрі «Мудараба» және «Астех.кз» компаниялары Мейіржанға 2 млн теңге қарыз деген қорытындыға келді», - деп жазады Жанна Оразбахова.

Оның айтуынша, «тергеушілер сараптама қорытындысын көргенде қатты таңқалған». «Олар енді бас есепшіге «Мейіржанды қаралап, жауап берсең, жазадан құтыласың» деп уәде еткен. Бұл олардың жаңа жоспары» дейді адвокат.

Естеріңізге сала кетейік, блогер Төребаев пен актер Шерниязов қаржы пирамидасын жарнамалады деген күдікпен қамауда отыр. Әуел баста олар 10 күнге қамалса, қазір уақытша абақтыда отырғандарына бес айдан асты. Яғни сот оларды уақытша қамау мерзімін үнемі ұзартып келеді.