Назарбаев университеті қыздарды зорлады деген бойжеткеннің бейнеүндеуіне жауап берді
Мекеме басшылығы тергеуге көмектесуге дайын
Назарбаев университетінің баспасөз қызметі желідегі бейнежазба бойынша басталған тергеуге қатысты пікір білдірді. Оқу орнының басшылығы жағдайды түсіну үшін тергеуге жан-жақты көмек көрсететінін мәлім етті, деп хабарлайды Azattyq Rýhy.
«Назарбаев университетінің студенті айтқан, тексеруді талап ететін сексуалдық сипаттағы құқық бұзушылық жағдайлары туралы ақпарат бойынша Нұр-Сұлтан қаласы Есіл ауданының полиция басқармасы тиісті процессуалдық әрекеттерді жүргізіп жатыр. Университет кез келген зорлық-зомбылық әрекетіне мүлдем төзбеушілік қағидатын ұстанады және тергеуге жан-жақты көмек көрсетеді», - деп мәлімдеді университеттің баспасөз қызметі.
Еске сала кетейік, әлеуметтік желілерде жас қыз Назарбаев университетінің оқытушылары мен техникалық қызметкерлер тарапынан болған бірнеше жәбірлеу және зорлау фактілерін білетіндігін, сондай-ақ жоғары курста оқитын студент қыздар төменгі курста оқитын қыздарды қудалайтыны туралы бейнежазба жариялаған болатын. Ал полиция бұл дерек бойынша тергеуді бастады.
