«Рәмізсіз шыққан тек қазақстандық делегация емес»: шахмат федерациясы Олимпиадаға не себепті тусыз барғанын түсіндірді

Қазақстан шахмат федерациясы Олимпиадаға не себепті тусыз барғанын түсіндіріп, ресми жауап жолдады, деп хабарлайды Azattyq Ruhy тілшісі.

«Алдыңғы олимпиадаларда спортшылардың шеруі болған емес. Әдетте Ту Олимпиаданың жабылу салтанатында қатысушыларды марапаттау сәтінде ғана қажет болатын. Биыл ұйымдастырушылар өзгеріс енгізуді ұйғарған, алайда бұл жайында делегацияны тиісті деңгейде хабардар етпеді», - делінген Қазақстан шахмат федерациясы Azattyq Ruhy тілшісіне берген жауабында.

Федерация «Олимпиаданың ашылу сәтінде мемлекеттік рәмізсіз шыққан тек қазақстандық делегация емес» екенін, сол сияқты басқа ел өкілдерінің жартысынан астамы ескертусіз шыққанын, ал кейбірі шеруге мүлдем қатыспағанын қоса айтты.

Ашылу салтанатында Қазақстан Республикасын халықаралық гроссмейстер Жансая Әбдімәлік пен халықаралық шебер Арыстанбек Оразаев таныстырған болатын.

Айта кетейік, шахматшы Бибісара Асаубаеваның анасы Лиана Таңжарықова Facebook-те Қазақстан құрамасы шахмат Олимпиадасына тусыз шыққанын айтып, бұл кешірілмейтін қателік деп жазған болатын.

Олимпиадада Қазақстан ұлттық құрамасының намысын мынадай шахматшылар қорғайды:

Ерлер құрамасы:

1. Ринат Жұмабаев
2. Муртас Кажғалеев
3. Арыстанбек Оразаев
4. Қазыбек Ногербек
5. Алишер Сулейманов

Әйелдер құрамасы:

1. Жансая Абдумалик
2. Бибисара Асаубаева
3. Гүлісхан Нахбаева
4. Ксения Балабаева
5. Назерке Нұрғали