Қазақстанда сыбайлас жемқорлық жасады деген күдікті 12 жылдан кейін Мәскеуде қолға түсті
Қазіргі уақытта оны Қазақстан Республикасына экстрадициялау рәсімі басталды
Іздеу салынған сыбайлас жемқорлық қылмыс жасады деген күдікті ұсталды. Сыбайлас жемқорлыққа қарсы іс-қимыл агенттігі қылмыстық қудалау органынан жасырынған адамдарды іздестіруге ерекше назар аударады. Бұл туралы Azattyq Ruhy ведомствоның баспасөз қызметіне сілтеме жасап хабарлайды.
Олардың көпшілігі қазақстандық сот төрелігіне қолжетімсіз болу үшін елден тыс жерлерде жасырынып жүреді.
«Сыбайлас жемқорлыққа қарсы қызметтің елордалық департаменті 2010 жылдан бастап сыбайлас жемқорлық қылмысы бойынша күдікті Болат Алтынбековті халықаралық іздестіруді жүзеге асырды.
Халықаралық ынтымақтастық шеңберіндегі жедел-іздестіру іс-шараларының нәтижесінде Ресей Федерациясының құқық қорғау органдары Сыбайлас жемқорлыққа қарсы қызметпен және Қазақстан Республикасы ІІМ Интерполмен бірлесіп, Мәскеу қаласында Алтынбеков ұсталып, қамауға алынды.
Тергеу органдарынан жасырыну үшін ол өзінің тегін «Алтынбековтан» «Алшерге» өзгерткен», - делінген Антикор хабарламасында
Қазіргі уақытта оны Қазақстан Республикасына экстрадициялау рәсімі басталды.
