Ол осы әрекеті үшін сотты болған
Құқық бұзушы осы жылдың 30 мамырында ұсталды. Тұрар Рысқұлов атындағы саябақтың аумағын патрульдеу кезінде Тараз қаласының Полиция басқармасы 1-полиция бөлімінің қызметкерлері полиция формасындағы күдікті жас жігітті байқады. Бұл туралы Azattyq Ruhy облыстық Полиция департаментіне сілтеме жасап хабарлайды.
Саябақта серуендеп жүрген жігіт полиция қызметкерлерін көріп сасып қалған. Тексеру барысында тәртіп сақшылары жалған полицейдің 19 жаста екенін және оның Түркістан облысының тұрғыны екенін анықтады.
Ұсталған азаматтың осындай қылмысы үшін 2022 жылдың сәуір айында Шымкент қаласында сотты болғаны белгілі болды. Ол кезде жас жігіт ТЖД қызметкерінің нысанды киімін киген екен. Оның мұндай қадамға қандай мақсатпен барғанын тергеу анықтайтын болады.
Аталған дерекке қатысты ҚР ҚК 390-бабының 1-бөлімі бойынша сотқа дейінгі тергеу амалдары басталды. Осы баптың санкциясы 80 айлық есептік көрсеткішке дейінгі мөлшерде айыппұл салу не сол мөлшерде түзеу жұмыстары не 80 сағатқа дейінгі мерзімге қоғамдық жұмыстарға тарту немесе жиырма тәулікке дейінгі мерзімге қамау түріндегі жазаны көздейді.