Мәулен Әшімбаев: Біз ел дамуындағы жаңа кезеңге қадам басып отырмыз

Azattyq Rýhy

Дауыс беруге құқылы азаматтарымыздың 68 пайызы референдумға қатысты

Мәулен Әшімбаев: Біз ел дамуындағы жаңа кезеңге қадам басып отырмыз
Фото: Парламент Сенатының баспасөз қызметі

Парламент Сенатының төрағасы Мәулен Әшімбаев референдумда халықтың 77,18 пайызы Конституцияға енгізу үшін ұсынылған өзгерістерді қолдап дауыс бергенін айта келе осылайша ел дамуындағы жаңа кезеңге қадам басып отырғанымызды мәлім етті. Бұл туралы Azattyq Ruhy хабарлайды.

Сенат спикері сөз басында жалпыұлттық референдумның алдын ала қорытындысы жарияланғанын, соның нәтижесі бойынша дауыс беруге құқылы азаматтарымыздың 68 пайызы референдумға қатысқанын айтып өтті.

«Олардың 77,18 пайызы Конституцияға енгізу үшін ұсынылған өзгерістерді қолдап дауыс берді. Осылайша, халық өз таңдауын жасап, Мемлекет басшысы Қасым-Жомарт Кемелұлы Тоқаевқа және Жаңа Қазақстан құру жолындағы бастамаларға қолдау білдірді.

Бұл демократиялық, құқықтық, әділетті мемлекет болуға бет бұрған еліміз үшін ең маңызды және шешуші қадам екені сөзсіз. Ендігі міндет – елдің осы қалауын іске асыру. Яғни алда ауқымды жұмыс күтіп тұр. Бұл ретте заңнамалық бағытта атқарылар істің маңызы зор. Сондықтан Парламент Сенаты қолға алынған саяси өзгерістерді жүзеге асыру үшін тиісті жұмысты жалғастыра береді.

Шын мәнінде, біз ел дамуындағы жаңа кезеңге қадам басып отырмыз. Басты мақсат – мемлекеттілігіміз бен Тәуелсіздігімізді нығайту, заң үстемдігі салтанат құрған әділетті Қазақстан құру және азаматтарымыздың әлеуметтік жағдайын жақсарту. Оған негіз болатын маңызды шешім қабылданды. Алдағы уақытта да ұлт болып жұмылып, көздеген мақсаттарымызға қол жеткіземіз деп сенемін», - деп жазды Мәулен Әшімбаев Facebook парақшасында.

×
Бұл желілік ресурстың ақпараттық өнімдері 18 жастан асқан адамдарға арналған.