Ресейден келген алаяқтар елордалықтың 137 млн теңгесін иемденіп кетті

Елорда тұрғыны полицияға арызданып, белгісіз біреулер оның 137 миллион 94 мың теңге ақша қаражатын алдап иемденіп кеткенін айтты. Бұл туралы Azattyq Rýhy қалалық Полиция департаментіне сілтеме жасап хабарлайды.

Ер адамның айтуынша, оған телефон арқылы белгісіз екі адам қоңырау шалған. Олардың бірі ер адам өзін қала прокурорының орынбасары ретінде, ал екіншісі – әйел адам өзін қаржылық бақылау бөлімінің қызметкері ретінде таныстырған. Олар оған алаяқтар өз шотынан ақша алуға тырысып жатқанын және бұл ақшаны үнемдеу үшін оны банктің кепілдік шоттарына жіберу керек екенін айтқан. Осылайша, ер адам өзінің барлық ақшасын 15 рет әртүрлі шоттарға аударған.

Жедел-іздестіру шаралары барысында «Сарыарқа» ауданының жедел уәкіл қызметкерлері күдіктілердің бірі Ресей Федерациясының 33 жастағы азаматын ұстады.

Қылмыстық топтың екі қатысушысы республикадан тыс жерде жасырынып үлгерген. Қазіргі уақытта іздестіру шаралары жүргізілуде.

Елорда аумағында қылмыстық топ жалған азаматтар арқылы банк карталарын рәсімдегені анықталды. Осылайша, бір ай ішінде күдіктілер ҚР әртүрлі банктерінде ашылған 35 банк картасын алған. Алаяқтық әрекеттерден алынған ақшаны олар қолма-қол ақшаға айналдырып, АҚШ долларына айырбастаған. Кейін қаскүнемдер валютаны криптовалютаға айырбастап, Ресей Федерациясына жіберген.

Қазіргі уақытта ұсталған азамат қамауға алынып, тергеу изоляторына қамалды.

Қылмыстық топпен аса ірі мөлшерде алаяқтық жасау фактісі бойынша ҚР ҚК 190-бабының 4-бөлігі бойынша сотқа дейінгі тергеу жүргізілуде.

Нұр-Сұлтан қаласының Полиция департаменті интернет-алаяқтардың құрбаны болмас үшін сақтық шараларын сақтауды ұсынады.

«Егер сізге осындай қоңырау түссе, ешқандай жағдайда SMS-кодты бермеңіз! Әңгімені үзіп, банктің колл-орталығының ресми телефондары бойынша ақпаратты нақтылаңыз. Барлық қауіпсіздік шараларын қосыңыз, 3D-Secure, сіздің телефон нөміріңізге СМС-хабарлама жібермей ешқандай төлем жасалмайды. Операцияларды жүргізу үшін осы кодты енгізу арқылы ғана растай отырып, сіз қандай да бір төлем операциясын жүргізе аласыз. Сондықтан мұндай қауіпсіздік әдістерін қосу керек», - деп ескертті полицейлер.