Алматыда мамыр мерекесіне орай 15 мың адамға қаржылай көмек көрсетіледі

Azattyq Rýhy

Бұл туралы Алматы әкімі Ерболат Досаев ардагерлер кеңесінің отырысында мәлімдеді

фото: Алматы қ әкімдігі

Алматыда Ұлы Жеңістің 77 жылдығы мен ардагерлер қозғалысының 35 жылдығын мерекелеу қарсаңында қалалық  ардагерлер Кеңесінің салтанатты пленумы өтті, деп хабарлайды Azattyq Rýhy.

Кездесуде Ұлы Отан соғысының ардагерлері, еңбек ардагерлері, интернационалист-жауынгерлер, Ауған соғысына қатысушылар, қоғамдық ұйымдардың өкілдері және т.б. болды.

Ерболат Досаев мереке қарсаңында ешбір ардагерлер назардан тыс қалмайтынын айтты.

«Өзім және менің орынбасарларым, аудан әкімдері және мәслихат депутаттары Ұлы Жеңіс күні қарсаңында әрбір ардагер мен соғыс ардагерін жеке келіп, құттықтайтын боламыз. 28 гвардияшыл-панфиловшылар атындағы саябақтағы мерекелік іс-шараларға қатысып, Мәңгілік алау жанында батырларды еске алуға ниет білдірген ардагерлер үшін арнайы трансферт ұйымдастырылады», - деді Ерболат Досаев.

Ағымдағы жылы қала мәслихаты Алматы әкімінің ҰОС қатысушылары мен мүгедектеріне төлемдерді екі есе – 500 мыңнан 1 миллион теңгеге дейін ұлғайту жөніндегі ұсынысын қолдады. Оларға теңестірілген тұлғалар 100 мың теңгеден алады, соғысқа қатысушылардың отбасылары мен жесірлеріне, тыл еңбеккерлеріне 50 мың теңгеден төленеді. Барлығы 15 мыңнан астам адам мемлекеттің қаржылық қолдауына ие болады, осы мақсаттарға бюджетте 1,1 млрд теңге қарастырылған.

Ерболат Досаев қарт адамдардың бос уақытын ұйымдастыру және оларға қолдау көрсету жөніндегі кешенді шаралар туралы да айтып берді. Қалада 200 мыңнан астам адамға тегін әлеуметтік қызмет көрсететін тоғыз белсенді ұзақ өмір сүру орталығы жұмыс істейді. Келесі жылы тағы бір осындай орталық ашу жоспарланып отыр.

Кездесу барысында қалалық ардагерлер кеңесінің төрағасы Ақан Бижанов Алматы қаласында ардагерлер қозғалысының белсенді дамығанын айтты. Қазіргі кезде Панфилов дивизиясы, әскери-әуе күштері, ӘШҚҚ әскерлері ардагерлерінің, Ленинград блокадалары мен фашизм тұтқындарының Кеңестері жұмыс істейді. Ардагерлер ұйымдарының мүшелері жауынгерлердің жерленген жерлерді күтіп баптайды, түрлі патриоттық акциялар өткізеді және жас ұрпақты тәрбиелеуге, оның ішінде «Шыңға өрлеу» жобасы аясында үлес қосып келеді. Жоба аз қамтылған отбасы балаларының тәлімгерлігіне аға буын өкілдерін кеңінен тартуда.

Пленум барысында Алматы қалалық және Алмалы аудандық ардагерлер Кеңесінің мүшесі Хамит Біржанов, Ұлы Отан соғысының ардагері, ҚР ҰҒА академигі, философия ғылымдарының докторы Досмұхаммед Кішібеков, Социалистік Еңбек Ері Вера Сидорова, ҚР еңбек сіңірген қайраткері Нұрлан Оразалин, Бостандық аудандық ардагерлер кеңесінің төрағасы Асен Беспаева сөз сөйледі. Қатысушылар ардагерлер ұйымдарының қоғамдық қызметі туралы әңгімеледі, қаланы дамыту бойынша ұсыныстарын айтты, сондай-ақ өткен жылдардағы жылы естеліктерімен бөлісті.

×
Бұл желілік ресурстың ақпараттық өнімдері 18 жастан асқан адамдарға арналған.